Matthew 15

Yesu ayi kikhulu ki Bayuda

(Malako 7.1-23)

1Bafalisi ayi minlongi mi mina baba ku Yelusalemi bayiza kuidi Yesu, banyuvula :

2—Bila mbi minlonguki miaku mikinzikilanga ko mambu ma bakulu e ? Bila misukulanga ko mioko miawu tuamina midia.

3Wuba wutudila :

—A bosi beno, bila mbi kalu kinzikilanga ko Mina mi Nzambi mu diambu di kinzika mambu ma bakulu beno ? 4Bila Nzambi wukamba : Kinzika dise diaku ayi ngudi aku ayi woso wunsinga dise diandi voti ngudi andi kafueti baka thumbudulu yi lufua. 5Vayi beno tala phila lueti tuba : Woso wukamba dise diandi voti ngudi andi ti : “Bima biabi biawu ndiedi kaveni vayi ndieka bitambika makaba kuidi Nzambi.” 6Mutu vengi diambu diodi kasi kadi diambu dimosi ko kuidi dise diandi voti kuidi ngudi andi mu biobi kedi kamveni. Buna lueti vunzikisa mambu ma Nzambi ayi lueti balula mawu mu kikhulu kieno. 7Batu ba mayuya ! Ezayi wubikula bumboti mu diambu dieno bu katuba :

8 Batu baba mu tsongi zi bididi kaka beta kunzitisila,
vayi mintima miawu thama midi ayi minu.
9 Mu phamba kuandi balembo kutsambidila
bila malongi balembo longi madi zithumunu zikubuku kuidi batu.
10Yesu wutumisa nkangu wu batu ayi wuba kamba :

—Luwa ayi lusudika : 11Biobi binkotanga mu munu wu mutu bisumunanga mutu ko vayi biobi bintotukanga mu munu wu mutu biawu bieta sumuna mutu.

12Bosi minlonguki mifikama va ndambu va kaba ayi minkamba :

—Wukadi zaba ti mintima mi Bafalisi miluedi mu diambu di mambu maku ?

13Yesu wuba vutudila :

—Kioso kunusu, kikambu kuna Dise diama di Diyilu, kiela vuzu. 14Lubabika ! Badi baphofo zilembo nati baphofo bankaka. Enati phofo wulembo monisa phofo yandi nzila, bawu buadi bafueti tibuka mu dibulu !

15Piela wubaka mbembo ayi wunkamba :

—Wutu sudikisa nongo yoyo.

16Bosi Yesu wuvutula :

—Beno mamveno lukadi sudika e ? 17Lukadi zaba ti bibioso binkotanga mu munu binkuendanga mu vumu bosi bintotukanga ku nganda e ? 18Vayi mantotukanga mu munu wu mutu mu ntima meti ba ayi mawu meti sumuna mutu. 19Bila mu ntima muntotukilanga mayindu mambimbi vonda, kitsuza, kindumba, yiba, telimina batu kimbangi ki luvunu, finga. 20Mawu momo mambu mansumunanga mutu. Vayi enati mutu kakadi sukula mioko tuamina kadia, diodi dilendi kunsumuna ko.

Minu ki nketo wukambulu Nyuda

(Malako 7.24-30)

21Yesu bu kabotuka vana ; wuyenda mu bizunga bi Tile ayi bi Sidoni.

22Zimbukila nketo wumosi, muisi Kana, wuba vuandanga muna bizunga beni wuyiza ku kaba ayi wuyamikina :

—A Pfumu ! Muana Davidi, wumboni kiadi ! Pheve yimbimbi yilembo yamisa ngolo muanꞌama wu nketo.

23Vayi Yesu kasi kumvutudila kadi diambu ko. Minlonguki mifikama va ndambu vaba Yesu ayi minleba :

—Wunkuka, bila wulembo yamikina ngolo ku manima meto.

24Vayi niandi wuvutula :

—Minu nditumu kaka kuidi mamemi ma Iseli momo mazimbala !

25Vayi nketo beni wuyiza fukama va ntualꞌandi ayi wunkamba :

—Pfumu, wutsadisa !

26Buna wumvutudila :

—Disi fuana ko mu bonga dipha di bana ayi lozila diawu zimbua.

27Nketo wunkamba :

—Nyinga Pfumu ! Vayi zimbua zieti dia bitsiedi-tsiedi biobi bieta bua ku tsi meza yi bapfumu bawu.

28Buna Yesu wumvutudila :

—E e nketo, minu kiaku kidi kinneni ! Diawu bika buvangama boso butididi. Muna thangu yina kaka muanꞌandi wunketo wubeluka.

Yesu wubelusa bambevo bawombo

(Malako 7.31)

29Yesu wubotuka vana ayi wuyenda ku muenda mbu wu Ngalili, wukuma ku mongo ayi wuvuanda kuna. 30Nkangu wu batu bawombo bayiza ku kaba, banata batu bobo baba ntiudikanga, baphofo, mababa, batu babela malu ayi mioko ayi bambevo bankaka. Babatula va malu ma Yesu ayi wuba belusa. 31Nkangu woso wu batu wusimina bu wumona ti mababa matona yoluka, batu babela malu ayi mioko babeluka, batu bobo baba ntiudika batona diata bu mboti, baphofo zitona mona. Buna baboso bakembisa Nzambi yi Iseli.

Yesu wudikila mili ya yi babakala

(Malako 8.1-10)

32Yesu wutumisa minlonguki miandi ayi wuba kamba :

—Kiadi ndilembo moni nkangu wu batu baba, bila bilumbu bitatu bame vuandila yama ayi basiedi ko bidia. Ndikadi zola kuba vutula ayi nzalꞌawu bila balenda bua dibutu mu nzila.

33Minlonguki mimvutudila :

—Va buangu kikambulu batu tuidi, buna kuevi tulenda bakila mapha mafueni mu dikila nkangu wu batu wawu e ?

34Yesu wuba yuvula :

—Mapha makua madi yeno ?

Bawu bavutula :

—Tsambuadi yi mapha madi yeto ayi bina bi zimbizi zi nlangu ! 35Buna wutumina batu boso bavuanda va tsi. 36Bosi wubonga tsambuadi yi mapha beni ayi zimbizi, wuvutula matondo, wubukuna mawu ayi wuvana mawu minlonguki miandi ayi miawu mikabudila nkangu wu batu. 37Baboso badia ayi bayukuta. Batota bitini biobi bisiala, biwesa tsambudi di bipani. 38Batu boso badia baba mili ya yi babakala, kadi tanga baketo ayi bana.

39Yesu bu kavutula nkangu wu batu, wukuma mu nlungu ayi wuyenda mu zunga ki Mangadani.